VI. 13-16

Part Two: On Cataline's Character
(A) Your past actions are all known; a moral invert.

VI.
Quid est enim , Catilina,

quod te iam in hac urbe delectare possit?
in qua
nemo est extra istam coniurationem perditorum hominum,
qui te non metuat,
nemo,
qui non oderit.

Quae nota domesticae turpitudinis

non inusta vitae tuae est?

 

Quod privatarum rerum dedecus

 

non haeret in fama?

quae lubido ab oculis,
facinus a manibus umquam tuis,
flagitium a toto corpore
afuit?

 

Cui tu adulescentulo,

 

quem corruptelarum inlecebris inretisses,
aut ad audaciam ferrum
aut ad lubidinem facem praetulisti?

14.
Quid vero?
nuper cum morte superioris uxoris

novis nuptiis domum vacuefecisses,

nonne etiam alio incredibili scelere hoc scelus cumulasti?

quod ego praetermitto et facile patior sileri,

 

ne in hac civitate tanti facinoris immanitas
aut extitisse
aut non vindicata esse
videatur.

 

 

Praetermitto ruinas fortunarum tuarum,

 

quas omnis impendere tibi proximis Idibus senties.

Ad illa venio,

quae non ad privatam ignominiam vitiorum tuorum,
non ad domesticam tuam difficultatem ac turpitudinem,
sed ad summam rem publicam
atque ad omnium nostrum vitam salutemque pertinent.

 

15.
Potestne tibi haec lux, Catilina,
aut huius caeli spiritus esse iucundus,

 

cum scias horum esse neminem qui nesciat
te pridie Kalendas Ianuarias
Lepido et Tullo consulibus
stetisse in comitio cum telo,
manum
consulum et principum civitatis interficiendorum causa
paravisse,

sceleri ac furori tuo
non mentem aliquam aut timorem tuum,
sed fortunam populi Romani
obstitisse?

 

Ac iam illa omitto --neque enim sunt aut obscura aut non multa commissa postea--

 

quotiens tu me designatum,
quotiens vero consulem
interficere conatus es!
quot ego tuas petitiones,
ita coniectas ut vitari posse non viderentur,
parva quadam declinatione et (ut aiunt) corpore effugi!
Nihil agis,
nihil adsequeris,
nihil moliris, neque tamen conari ac velle desistis.

 

16.
Quotiens iam tibi extorta est ista sica de manibus!
quotiens vero excidit casu aliquo et elapsa est!

quae quidem

 

quibus abs te initiata sacris ac devota sit
nescio,

quod eam necesse putas esse in consulis corpore defigere.